La kleur tan Millenium Challenge Corp. (MCC) sei fó-sai sira nia avaliasaun no mós performance data ne'ebé sei sai hanesan baze de selesaun ba nasaun ne'ebé elijivel atu simu fundu ne'e iha tinan fiskál 2009.
Iha prosesu selesaun ne'e, indikadór úniku nasaun hotu-hotu tenke passa atu kualifika ba fundu hosi MCC ne'e maka Kontrolu ba Korrupsaun (Control of Corruption). Indikadór ne'ebé sei uza atu halo selesaun ba simu fundu ne'e ba tinan fiskál 2009 sai iha fulan Jullu.
Timor-Leste piór
Tuir relatóriu hosi Centre for Global Development, tinan ne'e iha mudansa barak iha pontuasaun ba kontrolu ba korrupsaun.
Ba grupu nasaun sira ho rendimentu ki'ik (Lower Income Country), Timor-Leste kontinua monu nafatin ba okos, "Timor-Leste continues a pattern of decline". Iha tinan kotuk, Timor-Leste hetan 43% iha ninia kontrolu ba korrupsaun (tenki hetan liu 50% atu hetan konsiderasaun ba fundu MCC). Tinan ne'e Timor-Leste tun tan ba 39%.
Indonézia konsege hadi'a uitoan iha ninia média kompara ho tinan fiskál 2008.
Nasaun ho Susesu
Nasaun seluk ne'ebé foin daudauk kualifika ba hetan fundu hosi MCC maka Lesotho, Mongolia, Morocco, Mozambique (Mosambike) ho Tanzania. Mosambike, eis-kolónia Portugal no mós membru CPLP, simu $506.9 jutas hosi MCC atu ajuda nasaun ne'e hetan asesu ba bee-moos, rehab estrada to'o 500km, hadi'a sistema informasaun, hadi'a produtividade iha agrikultura no mós enkoraja diversifikasaun iha produsaun ba cash-crop. Tuir informasaun iha website MCC nian, fundu ne'ebé nasaun sira ne'e simu komesa implementa daudaun ona.
Komentáriu
Governu AMP lidera hosi Sr. José Alexandre Gusmão la hadi'a rai Timor-Leste. AMP ho Sr. José Alexandre hakiak maka KKN iha governu laran. Agora, emvés de Timor-Leste hetan osan hosi fundu ne'e, Sr. José Alexandre hasai fali hosi fundu seluk: Fundo Petrolífero. Ho korrupsaun maka'as iha AMP, osan hosi Fundo Petrolífero ne'e sei monu hotu ba AMP nia kroni sira
Sr. José Alexandre hasai fali osan hosi Fundo Petrolífero atu fahe ba ninia maluk sira emvés de hetan osan hosi MCC atu fahe ba Povu.
Timor-Leste la'o tuir daudauk nasaun sira seluk, ne'ebé riku iha rekursus naturais maibé kiak rabat-rai.
No comments:
Post a Comment