Marcha da Pás laiha problema

Brigadeiru Taur ko'alia liafuan ne'e relasiona ho marcha ne'ebé FRETILIN planeia atu halo iha tempu badak. Brigadeiru nia liafuan ne'e iha kontraste boot ho kampaña hata'uk ema hosi governu de faktu AMP ho ninia apoiante sira. Foin daudauk mosu intelektuál oioin, "traballadór" hosi rai-li'ur no "poeta" balun soe lia katak marcha da pás ne'ebé FRETILIN atu hala'o sei hamosu violénsia. Entre kampaña atu hata'u ema ne'e, Xanana Gusmão, primeiru ministru de faktu ameasa mós populasaun iha Ainaro katak sé maka bá tuir marcha ne'e, nia sei "hatama hotu iha kadeia". Iha ne'e ita bele haree karakterístika ida atu hata'uk povu atu povu labele expressa sira nia an ka sira nia asaun polítika - nomeadamente asaun sira ne'ebé kontra AMP. Xanana uza ameasa (kultura violénsia ida ne'ebé karakteriza Xanana nia karákter) atu hapara expressaun demokrátika ne'e, enkuantu ninia apoiante sira uza máskara akademia, traballadór ho poeta hata'uk populasaun ho teoria oioin.

Maibé sentimentu iha Timor laran hatudu katak populasaun baruk ho ameasa, baruk ho mau lohi sira, ne'ebé uluk balu temi dehan Lia Loos. Ita bele dehan katak populasaun mós baruk ho demonstrasaun. Maibé populasaun hatene nafatin katak expressaun polítika ne'e, iha forma saida de'it dezde ke la'ós violénsia, ema ida-idak nia direitu. Marcha da pás ne'ebé FRETILIN hakarak halo, ida ne'e direitu FRETILIN nian, konsagradu iha Constituição.

Tiu taxista ida fó hanoin fali katak iha 2005 kuandu igreja halo manifestasaun, laiha ema ida mak mai ko'alia to'ok kona ba instabilidade ka violénsia ka sá de'it. Maibé tiu taxista ne'e haree katak durante manifestasaun ne'e, ema hosi igreja rasik mak buka provoka situasaun atu sai violentu. Sira uza estátua Maromak nian maibé sira temi lia-fuan fo'er de'it hodi tolok ema ne'ebé sira la gosta. Sira uza estátua sira ne'e para atu lasu polísia sira. Karik polísia tenta kaer sira, maka estátua ne'e monu, entaun sira bele dada fali srani sira seluk atu monu ba sira nia lia-bosok. Maibé tiu taxista ne'e dehan katak nu'udár ema srani-oan, nia foufoun apoia demonstrasaun igreja nian. Maibé to'o ikus nia rasik haree ho matan katak organizadór sira hakarak uza fali nia. Tan ne'e nia sees an tiha hosi demonstrasaun ne'e. Maske nune'e nia apoia nafatin demonstrasaun ne'e tanba ida ne'e direitu ida-idak nian. Tan ne'e ohin loron nia mós apoia nafatin direitu ema hotu-hotu nian atu halo demonstrasaun i marcha da pás FRETILIN nian ne'e sei hatudu katak Timor-oan hotu-hotu hadomi demokrasia. "Só maka hakarak hapara marcha ne'e, nia ta'uk demokrasia. Nia hakarak ukun ho ditatura", tiu taxista ne'e dehan.

Iha fatin seluk, eis-IDP ida hatete katak marcha ne'e tenke la'o nafatin. "Iha 2006 kuandu milísia sira hanesan Rui Lopes lori ema mai sunu Dili laran, laiha ema ida maka mai ko'alia netik kona ba pás ka violénsia ka instabilidade ka sá #$!@ nia inan iha ne'e", nia dehan. Loos duni. Se iha 2006, ita husik eis-lider milísia sira mai halo demonstrasaun iha Dili laran, tansá maka ita atu taka fali dalan ba Timor-oan sira seluk atu expressa sira nia polítika? Demokrasia ne'e para bá milísia ho apoiante Sr. Xanana nian de'it?

Brigadeiro Taur dehan tan katak ita hotu lalika ta'uk FRETILIN nia asaun ne'e tanba FRETILIN mós hakarak nasaun ne'e nia di'ak tan ne'e sei laiha violénsia iha aksaun ne'e. Taur hatene katak eis-milísia sira, ne'ebé toman sunu uma ho halo violénsia iha 1999 no dehan katak Timor-Leste ukun-an manu nehan sei moris, apoia AMP, la'ós FRETILIN.

Di'ak liu Sr. Xanana ho ninia apoiante sira halo tuir saida maka deputadu Mario Carrascalão ho Francisco Branco akonsella: Tau matan ba korrupsaun ne'ebé sa'e maka'as iha governu AMP laran envéz de preokupa ho asaun demokrátika ida ne'e.

Ba Brigadeiro Taur Matan Ruak, Timor-oan sira agradese soldadu ida ne'e tanba nia hatudu duni espíritu lider nian loloos, ne'ebé buka garante sidadaun sira nia direitu demokrátiku hanesan knaar ida nia kaer metin iha fuan.

Obrigadu ba Brigadeiru.