Ema balu lakohi sidadaun sira komunika ho governante sira...

Iha kraik ne'e hau nia resposta ba Abel Pires da Silva iha forum RENETIL. Vice Primeiro Ministro de facto, Sr. Jose Luis Guterres hakerek ba forum RENETIL atu fo felisitasaun Natal ho Tinan Foun nian. Hau aproveita momentu ida ne hodi hakerek ba Sr. Jose Luis Guterres kona ba kazu korrupsaun balu nebe involve ministra da justisa, Dra. Lucia Lobato. Maibe Abel Pires da Silva dehan hau nia hakerek ne vulgar liu no la merese dirije ba ema bot sira. Abel Pires da Silva, nebe mak hamoris forum RENETIL dehan, "Hau ita tempu kmanek ida ne'e hau husu maluk atu diriji pergunta ruma ho respeitu. Hau hanoin ita boot nia pergunta vulgar liu, no fiar katak ita boot la presiza "hatun aan" hodi uza liafuan hirak ne'e." Hau nia resposta mak iha kraik:

Maluk Abel Pires da Silva,

Vulgar? Hatudu tok iha hau nia hakerek ne, parte ida nebe mak vulgar? Kuandu hau uza oportunidade atu husu pergunta ruma ba governante ida, pergunta nebe ladun konfortavel, ida ne mak vulgar ka? Se hau expresa hau nia opiniaun katak vice primeiru ministru ida ne DE FACTO deit, ida ne mak vulgar? Oinsa mak hau nia pergunta ne laos dirije ho respeitu? Bele hatudu tok maneira diak liu atu hau dirije hau nia pergunta ne? Se bele karik, hau apresia tebtebes i hau sei tuir Ita bot nia konselho.

Ka, maluk Abel Pires da Silva hakarak proteje governante sira ne husi povu nebe ma sira lidera ka representa? Ida ne hau senti hahalok ida elitist liu, elit sira buka protege malu.

Maibe maluk, iha hau nia opiniaun no ema barak nia opiniaun, buat ida vulgar ne mak iha kraik ne. Karik maluk Abel Pires da Silva sente buat sira ne normal?

1. Membru parlamentu sira simu kareta luxu, hetan salariu bobot, pensaun vitalisia, komputador laos servisu nian maibe atu halo gensi deit, viagem bobot ba liur
2. Vulgar mak membru parlamentu sira simu sira nia kareta luxu husi governu depois ba halo kareta reben metan kedan para povu nebe hili sira labele hatene saida mak sira halo iha laran, servisu ka vida particular
3. Vulgar mak ministra da justisa nia la'en hetan kredit husi governu ho folin liu $3 jutas para manan tender governu nian maski ministra nia lain rasik la hatudu kondisaun katak nia iha direitu atu manan, ezemplu ministra nia lain fo presu ida as liu fali ninia kompetisaun maibe nia mak manan duni
4. Vulgar mak vice primeiru ministru hasae ninia feen nia salariu para nia feen bele kontinua hela iha New York
5. Vulgar mak ne, ba Sr. Jose Luis Guterres, imi nia grupu "FRETILIN Mudansa" ne Tribunal de Recurso deklara tiha ona dehan laos FRETILIN, ne duni para ho uza atributo partido FRETILIN nian, tanba ida ne politicamente vulgar liu!
   
6. Vulgar mak governu nebe fo kontratu ba companhia Tres Amigos, nebe nain compostu husi ministru ida nia feen (Kathleen Goncalves), primeiru ministru nia amigo, Frans Halliwono ho militante primeiru ministru nia partidu, nebe uluk pernah involve iha kazu korrupsaun, Germano da Silva
7. Vulgar mak governu nebe justifica kontratu single source ba Tres Amigos ho situasaun emergencia, katak povu presiza hahan, maibe fos ne liu tiha fulan 5 mak foin tama. Iha fulan 5 nia laran ne povu han deit saida? Kesi kabun to fulan 5 ka?
   
8. Vulgar maka governu fo projeto ba ninia primeiro ministro nia subrino rasik atu sosa geradores ba EDTL liu husi Single Source
9. Vulgar mak governu nebe nega fundus husi MCC ba ninia povu tanba governu ne laiha vontade atu kontrola korrupsaun (hare iha leten). Bele download karta husi MCC ba governu iha ne.
10. Vulgar mak governu nebe militariza ninia polisia liu fali ninia militar, agora atu uza peredam suara (silenciador) ba PNTL hanesan standard issue.
11. Vulgar mak primeiru ministru nia hahalok nebe fahe osan fundasaun nian iha palacio do governo nia oin, sem criteria, sem processo, fahe arbiru deit hanesan ema riku nebe soe paun restu ba ema kiak sira (haree istoria ne iha Biblia)
12. Vulgar mak governu nebe bolu nia an IV Governo Constitucional maibe la hakruk ba desizaun husi Tribunal de Recurso, hodi viola fali Constituição
13. Vulgar mak governu nebe lakohi publika ultima edição husi Jornal da Republica tan lakohi rekonhese desizaun husi Tribunal de Recurso nebe deklara sira nia acto iha ilegal ho inconstitucional
14. Vulgar mak governu nia medida atu hasai tiha juiz husi Tribunal de Recurso nebe la foti desizaun tuir governo nia hakarak
15. Vulgar mak Ministro dos Negocios Estrangeiros nebe obriga Estado atu sosa bilhege viagem hotu-hotu husi ninia agencia de viagem (Timor Mega Tours) ho presu nebe aas tebtebes.
16. Vulgar mak vice ministra Madalena Hanjam ho SEJD Miguel Manetelu halo presaun ba agencia MSS, Hamutuk Harii Futuru, atu seluk kompensasi ba sira nain rua nia uma maski sira nia uma la hetan sunu
17. Vulgar mak Hanjam ho Manetelu pressiona MSS atu selu uluk sira tanba parese iha decreto nebe dehan katak membro do governo mak hetan uluk prioridade ba indemnizasaun sira ne
18. Vulgar mak supressaun ba investigasaun kona ba kazu 11 de Fevereiro nebe to ohin loron nunka mais sai

Ba Natal ho Ano Novo ida ne, vulgaridade barak. Vulgaridade husi embot sira nebe simu presente natal oioin, ho vulgaridade de vida husi povu kik sira nebe la konsege goza ho osan besik $1 bilhaun ida nebe governu hasai husi Fundo Petrolifero.

Iha ne se karik hau hatun an mos hau la importa maibe hau la taka matan ba buat nebe hau senti governante sira halo la los, hanesan simu kareta estadu nian foun hodi halo fali hanesan sira nia kusta. Se maluk dehan hau hakerek buat ruma vulgar, entaun hatudu tok mai hau atan, vulgar ne mak ida nebe? Hau simu ona korrespondensia husi vice primeiro ministro de facto rasik, Sr. Jose Luis Guterres, nebe hatan ba hau nia pergunta. Obrigadu ba Sr. Jose Luis Guterres nia resposta, nebe hau sei mantein nafatin hanesan konfidensial hodi respeita konfiansa nebe nia hato mai hau.

OK. Se maluk Abel Pires da Silva hakarak taka forum ida ne, i se karik ita bot hanoin dalan ida ne mak democratico liu, entaun bele taka. Forum ida ne Ita bot nian, LA'OS RENETIL nian. Maluk Abel lori RENETIL nia naran hodi loke forum ida ne, dehan forum ne RENETIL nian, maibe maluk Abel mak sei deside mesak atu taka ka atu loke, se mak bele tama, se mak bele hakerek, ida nebe mak vulgar, ida nebe mak laos, maluk mesak mak deside, ida ne maluk nia direitu tanba maluk mak loke forum ida ne, maski forum ne naran RENETIL. Ida ne mak demokrasia tuir maluk nia hanoin, entaun halo deit ba.

Ba Natal ho Tinan Foun 2009, hau hato'o hau nia boas festa ho laran tomak ba maluk sira hotu-hotu nebe partisipa iha forum ida ne, no mos ba povu kik-kiak sira iha Timor-Leste laran tomak. Hau iha esperansa katak 2009 sei sai tinan ida diak liu fali 2008, katak ita sei iha lideransa ida ho konsiensia moral diak liu tan atu hanoin uluk ba povu nia moris antes sira nia an rasik.

Hau sei la fo boas festa ho liafuan murak ba governante sira tanba sira simu boas festa barak liu ona, inklui presenta Natal karun-karun hanesan kareta PEJERO (maski sira mehi PRADO), salariu sae ba $3.500 kada fulan, simu beneficios mensal retroactivo husi 1 de Janeiro 2008 nebe total sai $12.000 iha sira nia konta, komputador luxu, proyek, etc. Hau hein deit katak imi bele fahe imi nia riku ne ho Timor laran tomak.

Ba maluk Abel Pires da Silva, boa sorte ho Forum foun, nebe sei exclui ema seluk ho perspectiva alternativa.

Hakuak boot.

Bailiku

Iha tan resposta balu husi Victor Tavares, maibe ida ne maulambe AMP ho Xanana nian, nebe hau lakohi gasta tempu ho espasu atu publika iha BLOG.