Breok dehan ona, paz sei sosa ho deit ho osan. Ho PAZ mak breok bele tur metin iha kadeira. Entaun ninia politika ne laos atu hamosu paz maibe atu kaer metin kadeira. Entaun nia fakar osan ba joven sira, ate fahe tan osan fundasaun nian iha palacio do governo nia oin; nia fakar osan ba ema hotu-hotu arbiru deit; nune para labele iha disturbio hodi nia bele tur metin iha kadeira. Problema sei mosu uainhira osan laiha ona. Sorti Timor iha netik Fundo de Petroleo. Sorti Timor la halo tuir Lasama ho Sabino sira nia ideia bainhira sira tebe raik kontra Alkatiri atu asina akordu iha Bayu Undan. Se lae oras ne Timor laiha osan! Agora Breok mak mai goza ho Fundo de Petroleo atu kaer metin ninia kadeira.
Breok mos tenki soe osan barak ba deputado sira. Ninia kadeira ne ninia deputadu sira mak kaer, nebe halibur iha Aliansa Mencari Prado ne ka AMP. Se nia la halo deputadu AMP sira ne kontenti mak sira vota kontra nia iha PN, entaun Breok monu husi kadeira. Nune Breok tenki fo buat oioin ba sira, regalias oioin. Sei hanoin ka lae? Uluk Fretilin tau lei ba pensaun vitalicia, Sabino, Lasama, Mario Carrascalao ho politikus lubuk ida mak kontra. Agora sira mak apoia makas ba Breok atu hasai povu nia osan husi FP atu fo salariu $3500 fulan-fulan ba deputadu sira, fo kareta luxu Prado ba deputadu sira, fo viagem ba sira ho regular. Ne mak Breok nia teknika atu nia kaer metin ninia kadeira.
Tuir fali mai mak ministru sira nebe mai husi partidu nebe tama iha Aliansa Mencari Proyek. Breok tenki halo mos sira kontenti tanba se lae karik, mak sira dada an husi AMP, entauk Breok mos monu. Entaun Lucia Lobato hetan proyek hodi fo ba ninia lain Americo Lopes. Americo Lopes hetan osan estadu nian $3.1 jutas atu konkorre fali ba tender estadu nian. Joe Goncalves nia feen Kathleen Goncalves ho Germano da Silva husi companhia 3 Amigos manan kontratu 14 juta resin atu sosa fos. Kontratu Single Source ne para fo hadiah ba politikus sira nebe suporta Breok hodi hetan kadeira Primeiru Ministru nian. Se sira kontenti, entaun Breok bele kaer metin nafatin ninia kadeira.
Agora tansa mak Breok hakarak kaer metin ninia kadeira? Tanba Breok mos iha interese atu habokur ninia familia. Ninia oan feto, Zenilda Gusmao mak agora sai Mbak Tutut Timor-Leste nian. Zenilda iha ligasaun diak ho empresario sira husi Korea do Sul. Agora kontratu governu nian hotu-hotu ba hotu empresario sira husi Korea do Sul. KOGAS mak manan kontratu segredu atu faan gas husi Greater Sunrise. Trator Agrindo barak mak mai husi Koreia do Sul. East Petroleum mos Koreia do Sul nian. Midori mos Koreia do Sul. Ate Nito Gusmao mos hetan kontratu juta ida resin atu halo ponte iha Viqueque neba. Nito ne engenheiro ruma ka? Haree iha dokumentu ne'e husi Mau Seran.
Breok fahe osan ba povu ho ninia kroni sira atu konsolida ninia pozisaun iha sistema politika Timor-Leste nian. Ho pozisaun ida konsolidada, nia bele naok osan hodi ajuda habokur ninia familia sira.
Ne duni kuandu hare ba politika fahe osan ne, sempre iha buat ruma husi kotuk. Sira fo osan ituan ba povu maibe sira naok juta ba juta husi banku. Ema Romawi sira dehan "give the people bread and circus". Ida ne maka agora mosu daudauk. Fo ba povu sira entertainment ho fos. Sira kontenti, sira nia kabun bosu, nai-ulun sira bele naok avontade tamba povu sei la hamrik kontra sira. Maibe politika ida ne atu lao to iha nebe? Kuandu osan laiha ona, Breok atu ba naok tan osan iha nebe? Hare ba Suharto. Maski nia naok tinan ba tinan, milyar ba milyar, maibe nia konsege mate ho vida nebe comfortable. Ditadorzeco ho corruptozeco sira hateke ba Suharto hanesan ezemplo. Naok mate mean maibe sira kontinua goza bainhira povo ejiji justisa. Justisa ida ne mak ita hakarak lori ba Timor-Leste?
Feliz Natal.
No comments:
Post a Comment