Fasilita sira nia vida partikular, ne'e maka kareta luxu Mitsubishi Pajero metan deputadu Parlamento Nacional ida nian hala'o hela wainhira nia para iha Leader Supermarket iha Delta, iha Sabado kotuk (3/1/09). Na'in ba halo kompras...
Ita la hatene kareta Pajero ida ne deputado ida nebe nian? Kareta ne reben metan tomak, no LAIHA plat ka matrikula. Kareta nain hasai tiha ona plat para ema labele identifika nia (paling2 deputadu AMP nian).
Karik deputadu sira husu kareta luxu atu fiskaliza governu nia lalaok ka atu hala'o vida partikular? Osan salario $3500 kada fulan ne la to'o atu fasilita sira nia vida partikular?
Se mak bele fiskaliza deputadu sira?
Iha kraik ne'e FRETILIN nia ezizensia atu halo investigasaun ba eskandalu PRADO sai PAJERO:
FRENTE REVOLUCIONÁRIA DO TIMOR-LESTE INDEPENDENTE
FRETILIN
FRETILIN
KOMUNIKADU BA IMPRENSA
Dili, 5 Janeiru 2009
FRETILIN: Presize Investiga Manipulasaun ba "Kontratu Prado sai Pajero"
Xefe Bankada FRETILIN iha Parlamentu Nasional, Aniceto Guterres ezigi investigasaun husi Provedor Direitus Humanus no Justisa ba prosessu sosa kareta ba deputadus neebe Bankada FRETILIN kontra makas no vota kontra iha plenaria. Xefe bankada FRETILIN koalia liafuan hirak nee ohin bainhira hasoru malu ho jornalista balun iha Dili, ohin loron 5 Dezembru 2009.
"Ema barak husu ona baa mi, tamba sa mak kontratu halo atu sosa Prado 65 ho folin ida, maibe depois Pajero mak mai fali? Ami mos ezigi presiza investiga tamba sa mak Prado sai fali Pajero? Se mak manan, se mak lakon ho manipulasaun ba kontratu original?" dehan Guterres iha Dili ohin.
"Ita hare ba dokumentus no prosesu sosa kareta ba deputadus. Husi nee ita hare kedas katak presiza duni investigasaun klean. Iha buat barak neebe presiza esklarese. Ita hare ba kontratu neebe ami hetan ho data loron 8 Maiu tinan 2008, entre Director Parlamentu Nasional nian ho diretor kompania Midori Motors Company, naran Kim Jungwoo. Depois ita hare ba surat Sr. Vicente da Silva Guterres, Vice Presidenti Parlamentu Nasional neebe hakerek iha 5 Maiu 2008 ba Sra. Emilia Pires, Ministra de facto Finansas. Surat ida nee 'Justificacao de Ajuste Direto' kona ba sosa kareta hirak nee. Iha surat ida nee Vice Presidenti Parlamentu hakerek momos katak atu sosa kareta ba deputadus ho folin US$2,171,000.00, tuir pagamentu rua, ida US$910,000.00 no tuir mai US$1,261,000.00."
Sr. Aniceto Guterres hatutan katak tuir artigus balun neebe hakerek iha kontratu sosa kareta ba deputadus 8 de Maiu 2008, Midori Motors iha direitu atu simu pagamentus rua ho total US$2,171,000.00 bainhira sira entrega ba Parlamentu Nasional kareta 65, no hakerek momos iha kontratu katak kareta 65 nee iha marka "Toyota, type Land Cruiser Prado, LJ120 R/L GKMEE 3.0D, 4 cylinder, 5-door, Manual Transmission", no hamutuk ho "manutensaun gratis ba tinan ida".
"Hakerek klaru los iha kontratu katak Parlamentu atu simu Prado 65 ho folin diak no kondisoens furak los. Maibe hanesan ita hotu hatene, maske iha kontratu atu sosa Prado 65, agora kompania hatama fali Pajero. Ita hotu mos hatene katak Prado kualidade diak liu, no nia folin aas liu Pajero. Tansa mak iha mudansa hirak nee? Nee hatudu manipulasaun bot ba kontratu. Tamba nee mak ami ezigi investigasaun klean lalais ida liu husi Provedor, no ami sei haruka iha semana nee nia laran ba nia," dehan Guterres.
Guterres dehan katak bankada FRETILIN hola desizaun hodi uluk kedas katak deputadu FRETILIN la simu kareta Prado ka marka seluk nudar deputadu individual tanba razaun barak, liliu tamba FRETILIN la simu katak ida nee mak prioridades aas liu horas dadaun, bainhira Povu barak seiduak hetan kondisoens basikus moris nian barak hanesan uma no bee no hahaan loroloron.
"Maibe ami kestiona mos uluk kedas tamba sa mak sosa kareta liu husi 'single source' ka 'fo deit' no la halo tender. Hodi tender deit mak bele hetan folin diak no evita KKN. Razaun nee mos hatudu baa mi katak, deputadus AMP ansi liu atu hetan benefisiu ba a'an uluk no la kuidadu ho Povu nia osan."
"Kontratu mos subar. Presidenti Parlamentu la hatan ba deputadus sira husi bankada partidu balun iha parlamentu bainhira sira husu kopia kontratu ida nee. Ikus liu ami hetan duni kopia husi dalan informal. Maibe ami la hetan husi presidenti parlamentu neebe lolos tenki se nia atu halau nia knaar ho transparensia. Iha debate orsamentu nia laran nia nega fali atu fo sai. Agora mak ami hatene tamba sa mak nia la fo sai dokumentus kontratu nee. Tamba iha irregularidades barak neebe presiza investiga," dehan Guterres.
Iha semana molok Natal meza parlamentu nasional hahu fahe kareta Pajero kor metan ba deputadu balun ona, agora lorloron kareta Pajero kor oioin tama iha parlamentu nia para fatin. Liu husi Xefe bankada, FRETILIN esklarese katak sira nia pozisaun nafatin la simu kareta ba deputadu ida idak. Deputadu husi partidu seluk hahu simu ona. FRETILIN no partidu PUN deit mak desidi atu la simu kareta nudar deputadu individual.
"Prenda Natal fahe ona hanesan husi Pai Natal. Agora presiza investiga prosesu sosa "Prado sai fali Pajero" buka hare se ema ruma halo KKN ka lae?" taka Aniceto.
PRESIZA TAN INFORMSAUN: Dere ba Deputadu Jose Teixeira 728 7080.
6 comments:
laos ida ne deit mak laiha plat ka matricula. kuaje kareta deputadu nian tomak laiha plat hotu!!!!
moe laiha liu pa asu naukten sira ne.
Maun Anis parabens!
Hau kongratula ita ho bankada Fretilin nia pozisaun ne'e. Maibe hanesan ema Timor oan, apalagi ita bo'ot ho maun Nando ne'e mesak ema RENETIL nian deit, tamba sa mak lakoalia didiak deit husi laran ba laran?! Iha parte balu hau mos konkorda ho ita bo'ot, tamba tuir hau nia hatene, maun Nando mos pernah koalia iha jornal katak nia sei esforsu atu sosa "KARETA PRADO HO FOLIN KIJANG". Hanesan ema ne'ebe simpatia ba maun Nando nia liafuan, momento hau kontente tebtebes, pelo menus maun Nando bele halo mudansa ruma hodi hatudu ba povu katak maun nando ne'e, lider ida ne'e mos husi manobras sira konaba osan no atitude ida ne'e bele hakotu korupsaun iha ita nia rai laran. Maibe afinal ikus mai dignidade parlamento ida ne'e nian monu mesak, tamba deit maun Nando nia tebe rai oan ne'e. Maibe laiha buat ida ne'e hanesan lisaun ida ba lideransa foin sae sira. Obrigado.
Husik ona ba! Buat ne'ebe liu, liu ona. Maibe hau hanoin kareta ne'e keta tau kor metan, tamba ne'e laos istora tempu uluk "Sejarah masa kelam", tau netik kor ida ne'ebe hatudu dignidade reprezentante povu Timor nian. Karik kareta ne'e kor metan, mak interpretasaun oin-oin sei mosu. Hau rasik bainhira hasoru kareta hirak ne'e iha tempo kalan hau nia isin fulun hamri'ik fali. Buat seluk mos ita nia membro parlamento balu mos aleijadu no mos vulnerabel, hanesan deputada husi bankada CNRT nian ida ne'ebe uluk iha plenario sempre keixa dehan nia kareta ema soke. Karik mak destino deputada ida ne'e mak simu ka utiliza kareta ne'e (kor metan) bele-bele soke at liu, ita bo'ot sira lahanoin nia vida ka? Tamba tuir hau nia haree deputada ne iha kapasidade bo'ot. Atitude ida ne'e (konaba kapasidade) deputada ne'e hatudu ona hodi halo rincian konaba pulsa telemovel ne'e nia rasik uza laiha rasionalidade hodi kritika Timor Telekom. Votos de Ano Novo e Boa Sorte ba destino Deputados sira.
Maun ida hato komentario konaba deputada vulnerabel ne kala seidauk hatene ka finjidu. Hau hatene mana deputada ne uluk ita bot nia mantan sa, los ka lae? Husik ba lalika laran taridu, tamba ita bot nain rua nia domin la tutan malu. Ita bot hatene didiak mana deputada oan ne nia istoria sa. Lalika konta fali iha blog ne. Ne halo deit ba "istoria masa kelam" ita bot nain rua nian, hanesan mos kareta kor metan no vidro metan nebe misterius ne. Hau haksolok ho komentariu hotu iha blog ne konaba kareta ba ita nia membros parlamento sira nian ne. Hau espera katak destitu deputados husi bankada Fretilin ho PUN defende nafatin sira nia pozisaun hodi la'simu kareta ne ba deputado ida-idak tinan ba tinan nafatin. Amen
Voto apoi ba Fretelin no PUN, nafatin fo konfiansa ba ami katak ami nia lideransa balun hakarak tebes defende povo nia interese du ke interese privadu nebe lori povo nia naran maibi halao aktividade atu bele benfisa deit nia-an no familia.
==========
Obrigado ba Lian Husi Foho Tutun nia posting. nafatin publika buat a'at e diak progresu ita nia rain nian.
Bombastick99'
Maun Anis, kekompakan partido Opozisaun nian iha ne'ebe?!!!!! Basta ser de Firaku, taka karau-kulit iha oin!!!!!!!!!!!!!!!!!!!!!!
Diak liu hakotu ona ho ita bo'ot nia deklarasaun murahan sira ne'e iha media, tamba realidade hatudu oin seluk!!!!!!!!!!!!!!!!!!!!!!!!!!
Obrigadu no a luta kontinua!
Post a Comment