Ministra Justisa hahú atake ba Jornál Tempo Semanal

BA PUBLIKASAUN EMIDIATU

Iha Timor Leste iha Estadu de Direitu ga la'e?

Ministra Justisa hahú atake ba Jornál Tempo Semanal.

Kazu ne'e krea potencial precedente tan kazu ida ne'ebé membru senior husi Governu loke dalan no hili atu uza ukun kona-ba difamasaun ba dala uluk hodi hasoru imprensa livre iha Timor-Leste.

Dili, Timor-Leste, loron 18 Dezembru 2008 – Iha loron 12 Dezembru tinan daudaun, Gabinete Prokurador Jeral notifika Jornal Tempo Semana, Jornál ne'ebé haklaken semana-semana, atu hatán lia iha loron 19 Janeiro 2009 kona-ba akuzasaun difamasaun ne'ebé Ministra da Justiça, Sr. Lúcia Lobato tatoli ba tribunal. Bainhira Tempo Semana husu atu hetan kopia husi akuzasaun, Gabinete Prokurador Jeral hatete katak ida ne'e imposivel, tan dokumentu ne'ebé Tempo Semanal husu konfidensiál, nune'e Gabinete labele fó dokumentu ne'e ba Tempo Semanal. Bainhira Gabinete Prokurador Jeral, Gabinete hatún Tempo Semanal nia direitu hodi prepara defeza atu hasoru akuzasaun difamasaun. Maibé ida ne'e hanesan irregularidade ida deit iha prosesu ne'e nia laran.

Iha loron 12 Outubru 2008, Tempo Semanal mós haklaken artigu ida ne'ebé ko'alia kona-ba posibilidade korrupsaun iha governu nia laran liu-liu iha kontratu balun iha Ministériu da Justisa. Artigu ne'e, sani na'in bele sani iha nakfati eletróniku ne'e iha dalen-tetun, no iha nakfati eletróniku ne'e iha lia-Inglés. Artigu ne'e hakerek tuir entrevista konfidensial balun no mós tuir sms ne'ebé Ministra tatoli no simu iha nia telemóvel ofisiál, priviléjiu ofisiál ida ne'ebé povu Timor-Leste rasik selu, tuir taxa ne'ebé sira selu hodi fó dignidade no priviléjiu balun ba lideransa rai ne'e.

Informasaun no testu iha mensajen laran ne'ebé Tempo Semanal haklaken ba públiku mai husi fonte[1] konfidensial, no Tempo Semana, sei satan no proteje na fatin ninia fonte.

Mensajen ne'e tatoli no simu iha númeru telefone Governu nian ne'ebé Ministra Justisa uza, no ne'ebé Estadu Timor-Leste selu, nune'e mós informasaun ne'e ema Timor-leste tomak nian. Mensajen hatudu katak sei iha suspeita katak Ministra Justisa fó informasaun balun ba emprezáriu Indonezia hodi fasilita sira nia negósiu iha Timor-Leste. Kontratu ne'ebé kona mensajen hanesan 1) kontratu atu hadi'a muru prizaun Bekora nian, 2) kontratu fornesimentu fardamentu ka uniforme ba guarda prizional no 3) halo design, fase no jere dokumentasaun identidade nasionál nian. Artigu ne'e sani na'in bele hetan iha nakfati Tempo Semanal online.

Tuir fali mai, Tempo Semanal, buka dalan no fó espasu ba Ministra atu klarifika uitoan kona-ba kazu alegada korrupsaun, maibé iha loron 16 Outrubru 2008, Ministra la fó oportunidade ba Tempo Semanal atu entrevista nia (filme ne'e sani na'in bele haree iha http://video.google.com/videoplay?docid=-7726925742023230405&hl=en).
Tempo Semanal mós haklaken kazu alegasaun Korrupsaun kontra Sr. Américo Lopes, Ministra Lúcia Lobato nia kabeen, no proprietáriu kompañia Pualaka Petróleo (Sani na'in bele haree artigu ne'e iha nakfati eletróniku ne'e http://temposemanaltimor.blogspot.com/2008/10/mina-edtl-guvernu-hili-presu-pualaka.html)

Mensajen telemóvel nian sani na'in mós bele haree iha nakfati internasionál ba denunsia Wikipeaks (http://wikileaks.org/wiki/Timor_Leste_Minister_Lucia_Lobato_SMS_tenders)

Tempo Semanal hetan ameasa indireta husi membru Governu nian ne'ebé hatete katak, karik jornál ne'e kontinua hakerek artigu kona-ba korrupsaun, ida ne'e sei la'o nafatin, maibé Tempo Semanal mós hetan lia-fuan apoiu husi membru governu balun, membru opozisaun no membru sosiedade sivíl seine'ebe fó korajen nafatin ba Tempo Semana.

Biar Tempo Semanal la iha rekursu hanesan Ministra Justisa nia rekursu, Tempo Semanal sei defende nafatin nia fonte, no mós papél mídia livre iha Timor-Leste- no tanba Tempo Semanal sempre hakru'uk ba lei ne'ebé vigora iha Timor-Leste, Tempo Semanal mós prontu atu haklaken nia hanoin tuir ukun, no la'o tuir ukun.

Tempo Semanal sei la simu osan husi Governu atu halai ba rai seluk, hodi evita fali prosesu judicial. Imi bele "oho ema ne'ebé haklaken lia-foun maibé imi labele oho lia-foun".

Tempo Semanal husu ba simpazantes ba jornál atu hatudu konfiansa no apoiu nafatin ba Jornal ne'e, no favór sani ami nia jornál semana-semana, ba simpatizante lia-foun seluk ne'ebé hakarak fó animu no votu konfiansa Tempo Semanal husu deit ba simpatizante atu halo ida ne'e tuir ukun, tuir lei.

Ema ne'ebé kritika ka la simu lia-fuan ne'e odamatan nakloke ba imi hotu hodi haklaken imi nia dezagradu, tuir hakerek, no tuir boikota hola no sani jornál Tempo Semanal.

Tempo Semanal hanesan jornal semináriu ida ne'ebé hahú servisu iha .... Tempo Semanal hetan nia finansiamentu husi publisidade ne'ebé ema balun hatama ba jornal, no la simu tulun seluk husi komunidade internasionál ne'ebé iha reprezentasaun iha Timor-Leste.
Iha tinan 2008 Tempo Semanal haklaken ba dala uluk kazu korrupsaun basuk iha Timor-Leste. Durante tempu ne'e, orsamentu jeral estadu sa'e 500% durante tempu ida ne'ebé la to'o fulan 18. Iha nia artigu, Tempo Semanal halo reportajen espesiál kona-ba alegasaun korrupsaun ba 1) Ministériu Saúde, 2) Sekretaria de Estado ba Solidariedade Social 3) Polísia Nasionál 4) Ministériu das Finansas 5) Gabinete do Primeiru Ministru e 6) Ministériu Justisa no seluk tan.

Atu hetan informasaun kle'an favór kontaktu

Tempo Semanal
Email: tempo.semanal@gmail.com /ka Taraleu@hotmail.com
Mobile/Telemovél: +670 723 4852
www.temposemanaltimor.blogspot.com

Tempo Semanal Legal Counsel: Aderito de Jesus Soares