Adeus Konflitu, Benvidu Otonomista?

Hercio Campos, otonomista, JAG ho Rekonstrusaun: Oinsa mak uluk agen SGI ikus mai lori bandeira FRETILIN.

Imi rona ona karik, imi rona los duni. Grupu "Mudansa" hari partidu foun ho naran "Fretilin (Rekonstrusaun)": Frente Rekonstrusaun do Timor-Leste Independente. Ida ne imita sira nia volante, Jose Alexandre Gusmao kuandu nia naok patrimoniu resistensia nian, CNRT, hodi halo sai nia partidu naran CNRT, Conselho Nasional da Rekonstrusaun Timorense. Ikus mai sira nia estrategia hanesan deit. Oinsa lohi povu ho simbolu sira ne atu naok sira nia fiar. Se Jose Alexandre Gusmao ba husu povu nia votu ho ninia foto ho ninia naran Jose Alexandre ka Xanana, konserteza povu sei la fo nein votu ida ba nia. Ema nebe fo votu ba nia ne mak ninia familia ho ninia kroni sira. Agora Fretilin Mudansa mos halo hanesan. Sira sei uja simbolu FRETILIN nian atu lohi povu hodi naok sira nia fiar. Maibe saida los mak sira nia objetivu? Sira nia objetivu lolos mak ne: oinsa naok, oinsa hariku sira nia an, oin sa manan proyek, oinsa hetan kadeira, oinsa bele goja sira nia vida a custa do Povu.

Agora tama Sr. Hercio Campos (Facebook), ema ida ne, uluk agente SGI iha tempu Bapa nian, agora uja simbolu FRETILIN nian atu lohi povu hodi buka diak ba ninia an rasik.

Sr. Hercio Campos nia maun mak Sr. Gui Campos. Sr. Gui Campos, ema nebe konhesidu iha tempu Bapa nian nudar agente SGI nian no halo krimi barak kontra Povu Maubere, iha tinan hira kotuk ba, aproveita ho vizita Amu Papa nian ba Sydney, tenta atu halai ba Australia atu hela iha neba. Maibe Timor oan balu konhese nia no kesar nia ba polisia. Polisia Australia atu kaer nia, maibe ikus mai nia konsege halai fali ba Timor-Leste. Instoria Gui Campos nian bele lee iha ne'e: Polisia Australia Aperta Gui Campos, Gui Campos, Halo krimi ka la halo krimi? ho Gui Campos labele halai husi justisa. Karik malu sira haluhan, Gui Campos mos membru Partidu Sosialista nebe Sr. Avelino Coelho kaer. Husi agente fascista SGI nian fila an ba ema Socialista? So Sr. Avelino Coelho nia Partido Socialista mak bele.

Blog Aileba Lian, ema husi partidu Mudansa mak kaer (ligadu ho partidu CNRT) nota katak afinal Sr. Hercio Campos mos agora Fretilin hotu, mais Fretilin mudansa. Bele lee notisia ne'e iha ne'e: Partidu FRETLIN (Rekonstrusaun) sei lori Dosente UNTL ba Tribunal.

Evidentemente ita hare katak partidu sira hanesan CNRT (Rekonstrusaun) ho Fretilin (Rekonstrusaun) laiha objetivu seluk selain atu buka oinsa serve sira nia interese rasik. Sira akumula hotu ema autonomista sira, ema korruptu sira, agen SGI sira, ho sese deit mak profesional naokten nian, tanba sira nia objetivu laos rekonstrusaun nasional maibe rekonstrusaun particular. Laos atu serve interese nasional, maibe interese particular. Laos eskola ba povu sira maibe uma ba sira nia an rasik. Laos transporte ba publiku maibe PAJERO ho PRADO ba sira nia an rasik. Laos empreza kiik ba povu sira maibe proyek ba sira nia an rasik. Laos empregu ba povu maibe kadeira ba sira nia an rasik.

Fretilin mudansa tama ba CNRT ho Fretilin nia simbolu maibe ikus mai Jose Alexandre Gusmao ho CNRT la manan buat ida. JAG tenke depende fali ba autonomista sira hanesan Gil Alves atu kaer governu. Ikus mai Fretilin mudansa la konsege hetan buat nebe sira hakarak iha governu tamba ema hanesan Gil Alves, ex BRTT, mak okupa fali kadeira ministru nian. Agora Fretilin mudansa frustradu hodi buka fali maneira foun atu lohi povu hodi naok sira nia fiar.

Maluk leitor sira mak hanoin tok ba. Se Hercio Campos ba fan nia oin iha foho neba, se los mak sei vota ba nia? Ema sei tuda nia mak iha tamba ema konhese ninia pasadu nudar agen SGI!! Agora Sr. Hercio Campos sei subar iha bandeira Fretilin nia kotuk!

Loke matan! Iha forsa oioin agora tau sira nia liman hamutuk atu naok lisuk Povu nia futuru. Timor-Leste agora iha osan nebe nia rai hamutuk atu garante ninia futuru. Osan ne hamutuk 7 biliaun USD! Osan barak, ahu-nain mos barak, ate halo SGI sira mos sai fali herois hotu! Ema sira hanesan Hercio Campos ho Gil Alves ho bensaun husi maun bot Xanana sei tenta nafatin atu nega futuru ida ba Timor oan tomak.

Keta haluhan! Kuandu Otonomista siar halai hotu ba Atambua ho Kupang, sira mos halo paktu ida atu oinsa sira bele fila fali mai Timor-Leste atu estabelese sira nian an depois atu kaer fali ita nia rain! Ida ne mak agora akontese hela ho JAG nia apoiu. Sira konsege kaptura hotu Povu Maubere nia simbolu resistensia nian, husi Komandante Xanana, to ASDT, to CNRT no agora FRETILIN.

Loke matan maluk Timor oan tomak. Ita nia luta naruk ne karik seidauk hotu?