Tribunal de Recurso deklara AMP nia verba iha OR inkonstitusionál

DEKLARASAUN BANKADA FRETILIN

Uma Fukun, Parlamentu Nasional

Dili, 13 Novembru 2008

Ohin Tribunal de Recurso publika sai akordaun, ka desizaun, hatan ba Petisaun Bankada FRETILIN no Deputadu AD ba Tribunal de Rekursu  atu halo Fiskalizasaun Abstrata ba Constitusionalidade e legalidade Lei Orsamentu Rectifikativu (Lei numeru 12/2008).

Tribunal hatan ho deklarasaun inconstitusionalidade kona ba:

 

1. Alinhea o) artigu no. 3 Lei Orsamentu Rektifikativu nian neebe aloka $240 milhoens ba Fundu de Estabelizisaun Ekonomiku
2. Norma 3 iha arigu 1 Lei Orsamentu Rektifikativu nian neebe  autoriza transferensia husi Fundu Mina Rai ba tinan ida nee ho valor $396,1 milhoens

Ida nee signifika Tribunal simu FRETILIN nia argumentu husi uluk kedas, husi tempo bainhira halao debate iha Parlamentu Nasional katak verba rua nee ILLEGAL no INCONSTITUSIONAL.

Nee signifika mos katak orsamentu $773,4 milhoens agora labele onahalo exekusaun ba montante $396,1 milhoens. 

Tribunal de Rekursu ordena mos katak ohin loron 13 Novembru 2008 ba oin, governu labele gasta tan verbas neebe afetadu ho ILEGALIDADE ida nee. 

Ami rona ona ministru no membru governu balun dehan ona no ordena ona sira nia funsionariu publiku atu halo kwitansi ka resibu ho loron no fulan retroativu atu halo manipulasaun ba tribunal nia desizaun ida nee.

Ami husu Governu no Parlamentu atu simu ho laran luan no diak desizaun tribunal nian ho laran luak iha Nasaun Timor Leste nudar Estadu de Direitu.

Ami bankada FRETILIN husu ba ema hotu, lalika viola desizauan tribunal ka akordaun ida nee, tamba bele hetan konsekuensia todan, maibe ministru ka membru governu de factu sira bele livre nafatin tamba sira bele dehan laos sira mak halo.

FRETILIN sei estuda klean liu tan desizaun ida nee no ninia impaktu ba orgaun soberania sira hotu.  Ami sei halo konferensia imprensa tan aban atu halo deklarasaun tan ba desizaun ida nee.

Aniceto Guterres

Xefe Bankada FRETILIN