tuku 8 dadeer. La hatene loos IDP sira hanusa? Ohin mos ai-funan midar
Alfredo ho Leopoldino nian. Sorte, udan boot para tiha ona iha dadeer
ne'e, no loron mos sa'e kedan. Matebian nia familia, kolega ho
apoiante sira bele iha fali paz uitoan atu hato'o sira nia orasaun.
Oras ne'e ami mos seidauk hatene se estado de citio ne'e sei prolonga
tan ba loron 30 ka lae. Horiseik parlamentu debate lei ne'e loron
tomak. Katuas "L7" maka hatete sai iha notisia katak, se bele, estado
de citio ne'e prolonga ate 2012! 2012? Bulak. Maibe ba governu, parese
so ho estado de citio maka sira bele kontrola populasaun. Ho estado de
citio maka bele hapara ema mai nalubun hamutuk hodi halo konspirasaun
oioin - planu ba halo demo, sunu roda, sunu uma, ho sst. Agora ne'e
kalan ema hotu-hotu obedese recolher obrigatorio ne'e. Estrada laran
maten, so F-FDTL, PNTL, UNPOL, GNR ho ISF maka la'o tun-sa'e. Desde
insidente iha 11 de Marsu ne'e, ate agora laiha iis hosi operasaun
hasoru ema sira be halo ataka ne'e. Kaer fali maka Angelita Pires!
Hafoin buka mos hafo'er oponente politiku sira nia naran hodi lori
sira ba polisia ho karreta polisia nian. Se maka la apoia AMP agora,
sira mos tuur nakdedar hela tanba lahatene bainhira maka polisia mai
baku sira nia odanmatan. Sira dehan buka Gastao Salsinha la hetan.
Afinal Gastao Salsinha fo entrevista tun-sa'e hela ba jornalista sira
iha rai-laran, Portugal ho Australia.
Taur Matan Ruak mos baruk ona ho jogada sira ne'e. Ohin Taur dehan nia
hapara tiha F-FDTL nia operasaun tanba governu haruka fali sira ba
buka ema sira ne'e iha fatin seluk - Dili laran, Dare ho Balibar.
Klaru. To'o oras ne'e ema ne'ebe maka ataka Presidente Ramos-Horta
ne'e laiha Dili laran ona. F-FDTL ba halo operasaun fali iha Dili
laran para halo saida? Tanba sa? Depois mosu fali inkieritu UNMIT
nian, ne'ebe dehan Ramos-Horta hetan uluk tiru depois maka Alfredo ho
Leopoldino mate. Hmmm.... Ha'u haree tiha ona investigasaun ne'e, iha
buat barak maka la loos. Haree de'it, investigasaun ne'e seidauk hetan
depoiamentu hosi grupu armadu ne'ebe halo atake sira ne'e! Ohin, iha
mos notisia katak Presidente Ramos-Horta komesa di'ak dadauk ona. Nia
ko'alia ona ba ninia familia sira. Talves, iha semana hira mai ita
bele hatene istoria balu hosi Ramos-Horta rasik.
Oras ne'e, tuku 5 loraik, lalehan moos loos. Foho Marabia ho Dare mos,
moos loos. Ema ruma subar karik iha Samtuku hun sira ne'e nia leet,
ha'u sente hosi tasi-ibun mos ita bele haree sira moos. Tuir kolega
ida dehan, soldadu ISF sira maka agora patroli maka'as iha foho sira
ne'e. Jornalista sira la konsege ba Dare ho Balibar atu investiga
insidente atake kontra PM de facto, Jose Alexandre Gusmao (JAG). Maibe
kolega ne'e dehan, laiha ema ida maka beik ba subar fali iha Dare
ne'eba. Karik F-FDTL hatene sira sai dala ida tan hanesan instrumentu
iha politiku sira nia jogada.
Ho loron ne'ebe naroman, udan ladun tau, ha'u sei la'o de'it ba uma.
Liu hosi Jardim Borja, tun mai Jardim Colmera, to'o Sional,
kontinua... Ha'u hakarak haree de'it IDP sira nia kondisaun oinsa.
Husu boot katak ohin kalan udan keta tau lai, atu husik bee nalihun
iha kampu IDP laran maran uluk lai. Problema ida seidauk hotu, husu
boot atu problema seluk labele mai lai... Ita hein.
No comments:
Post a Comment