situasaun kalma, estado de citio obriga nafatin ema atu tama uma tuku 8 kalan, hela iha uma laran to'o tuku 6 dadeer. ema hotu-hotu respeita estado de citio. laiha insidente ruma, pelomenus hori kalan. ohin dadeer iha taxi laran, taxista dehan: "presidente ramos di'ak agora, nia sei bele ko'alia buat barak." nia hatete tan katak, presidente ramos husu fali "major alfredo di'ak hela ka lae?" nia hatene ona ka lae? ha'u sosa jornal ida hodi hatudu foto alfredo mate ba taxista ne'e. taxista ne'e la dehan buat ida. nia haree tiha ba oin. kolega malae ida dehan, nia ba buka DVD alfredo nian atu sosa. bainhira nia husu ba ema, ema halai de'it. ema tauk. ikus ne'e ema temi de'it alfredo nia naran mos ema tauk. taxista ne'e kontinua hodi dehan, "ita ema ki'ik ne'e di'ak liu ita tuur hakmatek. ita kilat laiha. ita forsa laiha. ita han-hemu mos susar. ita buka moris uitoan-uitoan de'it. maibe buka hela mos fatin atu halai. buat ruma karik, ita halai hodi biban." aban alfredo nia ai-funan. ita hein...
No comments:
Post a Comment